KAS IR ASOCIACEJA

Latgalīšu volūdys, literaturys i kulturviesturis školuotuoju asociacejis nūdybynuojums (turpmuok LVLKŠA) ir navaļstiska organizaceja, kas apvīnoj izgleiteibys i kulturys darbinīkus, kam ryup latgalīšu volūda i sova nūvoda kulturys montuojuma apzynuošona i saglobuošona, realizejūt Vaļsts volūdys lykuma 3. panta 4. apakšpunkta praseibu:  “Vaļsts nūdrūšynoj latgalīšu rokstu volūdys kai viesturiska latvīšu volūdys paveida saglobuošonu, aizsardzeibu i atteisteibu.” 

 Asociacejis mierkis - saglobuot latgalīšu rokstu volūdu, veicynuot kulturviesturiskuo montuojuma vuiceišonu Latgolys školuos, školuotuoju pošizgleiteibu i pīredzis apmaiņu, vodūtīs pēc  UNESCO ziņuojumā “Izgleiteiba 21. godu symtā” nūsaceitajim četrim izgleiteibys pamatprincipim: 

1) vuiceišonuos zynuot, kab dabuot sapratnis leidzekļu;

2) vuiceišonuos dareit, kab spēt rodūši sasadorbuot ar apleicejū pasauli;

3) vuiceišonuos dzeivuot kūpā, kab pīsadaleit i sasadorbuot ar cytim cylvākim vysuos cylvāka darbeibys jūmuos;

4) vuiceišonuos byut, kab lobuok atteisteit personeibu.

Bez nacionaluos identitatis, sova nūvoda kulturys montuojuma apsazynuošonys navar  izaveiduot personeiba ar plašu, kulturys ziņā boguotu i gudru pasauļa redziejumu.