Par Vuolyudzānim - 2023 i vaļsts atkluotū latgalīšu volūdys i kulturviesturis olimpiadi

29. apreļs – saulaina i sirsneiga dīna latgalīšu volūdys gūdynuošonai suocēs ar dzejneicys Annys Rancānis uzrunu i dzīsmi “Skaidruo volūda”. Jau divdesmit trešū godu LVLKŠ asociaceja organizej skotuvis runys konkursu “Vuolyudzāni” i olimpiadi latgalīšu rokstu volūdā i kulturviesturē. Šūgod skotuvis runis konkursā pīsadaleja  43 vuolyudzāni nu 21 izgleiteibys īstuodis (Aglyunys nūvods: Aglyunys Katuoļu gimnazeja, Bolvu nūvods; Baļtinovys v-šk., Bierzpiļs p-šk., Rekovys v-šk., Ruguoju v-škola, Viļakys Vaļsts gimnazeja; Rēzeknis nūvods: Bieržgaļa p-šk., Gaigalovys p-šk., Drycānu v-šk., Nautrānu v-škola, Viļānu Muzykys i muokslys škola; Rēzeknis 5. v-škola; Ludzys nūvods: Cyblys v-šk., Kuorsovys v-šk., Ludzys piļsātys v-šk., Ludzys Muzykys p-škola, Mežvydu PII; Augšdaugovys nūvods: Špoģu v-škola; Preiļu nūvods: Rībeņu v-škola; Kruoslovys nūvods: Kruoslovys gimnazeja, Tukuma E.Birznieka-Upīša p-škola). Lela  prīca vysim  beja par pasuokuma atsagrīsšonu kluotīnē.

    Konkursu pa vacuma grupom viertēja dzejneicys Anna Rancāne i Līvija Liepdruviete, Rēzeknis Tautys teātra režisore Māra Zaļaiskalns i aktrise Vija Dikule,  Latvejis radejis Latgolys studejis vadeituoja Renāte Lazdiņa i producents Guntis Rasims.

     Tekstus Vuolyudzāni beja izavieliejuši skaiteit Ontonu Slišānu, Anneli Slišāni, Mariju Dzeislu, Inetu Atpili –Jugāni, Ilzi Spergu, Janu Skrivļi Čeveri, Raibū, Valentinu Lukaševiču, Intu Naglu, Ontonu Kūkoju  i cytus autorus. Tikai daži skaiteja i fabulys.

Renāte Lazdiņa atzeist: “Vuolyudzāni ir breineigs bārnu konkurss, kurais, paļdis Dīvam  otkon atsagrīzīs kai kluotīnes pasuokums. Kluotīnē auditorejis prīškā uzastuot ir vierteiguok. Itymā godā mozī vuolyudzāni beja labi sasagatavejušīs i nūviertēt lobuokū nabeja vīgls aizdavums, taipoš ari izvālātuo literatura beja interesanta i laikmeteiga. Itys dzejis skaiteišonys konkurss deļ bārnu i vysas sabīdreibys ir cīž svareigs, tai kai latgalīšu volūdai i literaturai dadūt nūzeimeigumu taišņi bārnu i školuotuoju acīs. ”

Māra Zaļaiskalns uzsver: "Ļoti daudzveidīga programma, vecumam atbilstoši izvēlēti teksti! Spēja atvērt savu pasauli, savu personīgo attieksmi pret izvēlēto materiālu. Priecē tīra valoda!!!  Pietrūkst prasmes uzstāties publikas priekšā , noturēt klausītāja uzmanību.

Paldies visiem, skolēniem, skolotājiem, organizatoriem par iespēju būt kopā šajā ļoti būtiskajā procesā."

Guntis Rasims soka: “Latgalīšu runys konkurss "Vuolyudzāni" i latgalīšu volūdys i kulturviesturis olimpiade jau daudzi godu ir breineiga īspieja bārnim i jaunīšim styprynuot sovu pošapzini, nūvoda identitati i lokalū patriotismu. Sovā saziņā puorsvorā runoju ar vysim latgaliski - voi tys ir dorbs Rēzeknis nūvoda dūmī, voi organizejūt kulturys i izgleiteibys pasuokumus i projektus vysā Latvejā. Tam vajadzeiga zynoma drūsme i puorlīceiba. Varu viņ pasateikt "Vuolyudzānu" organizatorim par sovlaik pošam dabuotu pīredzi itymā konkursā. ”

Skotuvis runys konkursa rezultati:

   22. vaļsts atkluotajā latgalīšu volūdys i kulturviesturis olimpiadē šūgod pīsadaleja septenis komandys (Baļtinovys v-škola, Drycānu v-škola, Kruoslovys gimnazeja, Ludzys piļsāts v-škola, Nautrānu v-škola, Rekovys v-škola, Rēzeknis Vaļsts 1.gimnazeja).

      Olimpiadē otkol beja pīcys kuortys. 1. kuortā školāni atkluoja sovys prasmis latgalīšu rokstu volūdys pareizraksteibā, 2. kuorta beja veļteita kinai “Latgalīši Sibirī”, 3. kuortā vydsškolāni veica aizdavumus par Ontona Slišāna gruomotu “Čipierkstneits jeb apcirsto sakņu pieaudzēšana”, 4. kuortā vajadzēja īpazeit Annelis Slišānis “100 deči Latvejai”, bet 5. kuortā beja Latgolys kulturtests, kū sagataveja latgalīšu kulturys ziņu portals lakuga.lv, par latgaliskajom aktivitatem 2022. godā. Aizdavumus izstruoduoja profesoris Lidija Leikuma i Ilga Šuplinska, Laura Melne, kulturys ziņu portala lakuga.lv redaktore. Vydsškolāni atzeist, ka aizdavumi beja interesanti, bet gona gryuti.

Profesore Lidija Leikuma stuosta:

  “Šūgod vairums olimpiadis aizdavumu — tai voi cytaiži — saistejuos ar Slišānim, kas, teoretiski jamūt, varēja dūt lelys prīškrūceibys komandom nu Zīmeļlatgolys. Tok nā, i itys apstuoklis lītu paruoda kai objektivu byušonu!... Deļ loba rezultata ir vajadzeiga nūpītna pīeja gatavejūtīs — vīna pādejuo vokora var izaruodeit stypri par moz, taipat vajadzeiga Latgolā nūteikūšuo loba pazeišona — jaunuokūs laiku i saisteibā ar LVLKŠA pīduovuotajom temom.

Paļdis vysom septeņom olimpiadis komandom i paļdis jūs gataveituojim školuotuojim! Paļdis latgalīšu perpetuum mobile jau tik daudzu godu garumā — Ilgai Šuplinskai i LgSC (kusteiba „Volūda“) aktivistem, kas nūvadeja kulturtestu! Paļdis atsauceigajai Rēzeknis Vaļsts 1. gimnazejai (direktors Juoņs Poplavskis)! ”

     Profesore Lidija Leikuma ir olimpiadis vierteituoja jau nu 2001.goda, jai itys ir gūda pasuokums, ir gondarejums redzēt, ka jaunīši jau divdesmit treis godus apgiust latgalīšu volūdu i kulturviesturi ( koč i fakultativi).

    Nu 100 punktim, kū varēja īgiut olimpiadis kuortuos,

1. vīta ar 81 p. – Nautrānu v-školai (Rinalds Ludboržs, Alise Mazure. Rūta Vonoga i Renārs Jūrdžs), šk. V. Dundure;

2. vīta ar 73.5 p. – Drycānu v-školai (Arnolds Anufrijevs, Raitis Igaunis, Krista Kokina, Egita Melne, Elgars Razgalis), šk. S. Laizāne;

3. vīta ar 69 p. – Ludzys piļsātys v-školai (Alise Alitkina, Sanda Augustova, Kamila Makarova, Laura Mortuzāne, Rasma Vonda), šk. L. Budreviča.

Paļdis Imantam Slišānam, Evikai Muizniecei, Anitai Koniševai, Ingai Skerškānei i Ilgai Stikutei par īguļdeitū dorbu, lai sagatavotu v-školānus olimpiadei.

Leluokais paļdis ir Ilgai Šuplinskai, Lidijai Leikumai i Laurai Melnei par aizdavumu sagataveišonu olimpiadis kuortom. Parosti pīsadolūt vuiceibu prīkšmatu olimpiadēs, školāni i školuotuoji nikod nazyna, kas ir gatavejs aizdavumus.

   Paļdis Rēzeknis nūvoda pošvaļdeibai, kura kotru godu finansiali atbolsta skotuvis runys konkursu “Vuolyudzāni” i vaļsts atkluotū olimpiadi latgalīšu rokstu volūdā, Rēzeknis Vaļsts 1. gimnazejai, par bolvu saryupiešonu  – Rēzeknis Tehnologeju akademejai, interneta veikalam “Taiseits Latgolā”(Artim Loginam), z/s “Kotiņi”, SIA “Madara LV”, Latgolys Kulturys centra izdevnīceibai i žurnalam “A12” (redaktorei Inārai Grocei).

Olimpiadis aizdavumus varēs skateit www.ltgasoc.lv